I kërkuar nga SPAK për ndërmjetësim e një vrasje të mbetur në tentativë, arrestohet Aldo Baho në Itali

Një 37-vjeçar shqiptar i shpallur në kërkim ndërkombëtar është arrestuar në Itali, në kuadër të operacionit “The Wanted”. Bëhet fjalë për Aldo (Aleksander) Bahon, i dyshuar si pjesëtar i një grupi kriminal dhe për ndërmjetësim në një vrasje të mbetur në tentativë.

Sipas njoftimit të Policisë së Shtetit, Baho u kap në qytetin e Asti-t, me qëllim ekstradimin drejt Shqipërisë, pas bashkëpunimit mes specialistëve të Drejtorisë për Hetimin e Krimit të Organizuar dhe shërbimeve të Guardia di Finanza-s në Pisa.

Sipas hetimeve, në vitin 2022, 37-vjeçari dyshohet se, në kuadër të grupit kriminal ku bënte pjesë, ka ndërmjetësuar për vrasjen e shtetasit L. M., ngjarje që mbeti në tentativë.

Më 29 shtator 2026, Gjykata e Posaçme kundër Korrupsionit dhe Krimit të Organizuar (GJKKO) i ka caktuar Bahos masën e sigurisë “Arrest në burg”.

Ai dyshohet për veprat penale “Vrasja”, e mbetur në tentativë dhe e kryer në kuadër të grupit të strukturuar kriminal, “Mbajtja pa leje dhe prodhimi i armëve, armëve shpërthyese dhe municionit”, “Grupi i strukturuar kriminal” dhe “Kryerja e veprave penale nga organizata kriminale apo grupi i strukturuar kriminal”.

Njoftimi i policisë:

Policia e Shtetit/Finalizohet një tjetër fazë e operacionit “The Wanted”, në bashkëpunim me homologët italianë.

Kapet në Itali, 1 shtetas në kërkim ndërkombëtar, pjesëtar i një grupi kriminal, i dyshuar për ndërmjetësim për një vrasje të mbetur në tentativë.

Si rezultat i bashkëpunimit të ngushtë dhe të vazhdueshëm ndërmjet specialistëve të Sektorit për Hetimin e Grupeve Kriminale në Drejtorinë për Hetimin e Krimit të Organizuar, në Departamentin e Policisë Kriminale, dhe shërbimeve të GdF-së në Pisa, Itali, u kap në Asti, me qëllim ekstradimin në Shqipëri, shtetasi i shpallur në kërkim ndërkombëtar Aldo (Aleksander) Baho 37 vjeç, lindur në Elbasan.

Më datë 29.09.2026, GjKKO-ja i ka caktuar këtij shtetasi, masën e sigurisë “Arrest në burg”, për veprat penale “Vrasja”, mbetur në tentativë, kryer në kuadër të grupit të strukturuar kriminal, “Mbajtja pa leje dhe prodhimi i armëve, armëve shpërthyese dhe municionit”, “Grupi i strukturuar kriminal” dhe “Kryerja e veprave penale nga organizata kriminale apo grupi i strukturuar kriminal”.

Në vitin 2022, shtetasi Aldo (Aleksander) Baho dyshohet se në kuadër të grupit kriminal ku bënte pjesë, ka ndërmjetësuar për vrasjen e shtetasit L. M., krim i cili mbeti në tentativë.

Vijon bashkëpunimi ndërmjet Interpol Tiranës dhe Interpol Romës, për të finalizuar procedurën për ekstradimin e këtij shtetasi në Shqipëri.