Një dron rus goditi Urën Veriore të Kievit, mbi lumin Dniepër, duke shënuar ditën e katërt radhazi që Rusia shënjestron urat e përdorura nga mijëra banorë për të udhëtuar mes dy brigjeve të qytetit.
Pamjet filmike tregojnë automjete që po kalonin urën në momentin kur droni u përplas në rrugë dhe shpërtheu, duke shkaktuar zjarr. Dy persona mbetën të plagosur nga sulmi, bëri të ditur kryebashkiaku i Kievit, Vitali Klitschko.
Sulmi ndodhi pak pasi Merz mbërriti në qytet në një vizitë të paparalajmëruar, që synonte të riafirmonte mbështetjen e Gjermanisë për Ukrainën, ndërsa vendi po hyn në një nga periudhat më të pasigurta që nga nisja e pushtimit rus në shkallë të plotë, në vitin 2022.
Gjermania është bërë ofruesi më i madh i ndihmës ushtarake për Ukrainën që kur Merz mori detyrën në maj të vitit 2025, duke tejkaluar SHBA-në, ndërsa mbështetja amerikane ka rënë.
Kievi është përballur me sulme pothuajse të pandërprera nga dronë të rinj rusë me motor reaktiv gjatë javëve të fundit. Fushata në rritje e sulmeve po pengon gjithnjë e më shumë jetën e përditshme në kryeqytet dhe rrezikon ta lërë qytetin pa energji elektrike gjatë këtij dimri.
Lexo gjithashtu
Presidenti ukrainas, Volodymyr Zelenskyy, i tha Merz-it se banorët e Kievit po përjetonin “netë dhe ditë të tmerrshme” për shkak të sulmeve të pandërprera, ndërsa i cilësoi kundërshtarët rusë të Ukrainës si “barbarë absolutë”.
“Ne të gjithë mund ta shohim kotësinë e kësaj lufte në këtë vend”, tha Merz, duke shtuar pas mbërritjes se Ukraina “ka nevojë për gjithë mbështetjen tonë në javët e ardhshme. Nëse Rusia nuk ndalet, makina e saj e luftës herët a vonë do të kthehet kundër nesh”, deklaroi ai.
Rusia e kishte dëmtuar më parë Urën Veriore të Kievit dhe kishte goditur vazhdimisht edhe Urën Jugore. Megjithëse kalimet mbeten të hapura, sulmet e përsëritura dhe kërcënimi për goditje të tjera kanë detyruar autoritetet e qytetit të kufizojnë ose pezullojnë trafikun në pesë nga gjashtë urat rrugore mbi Dniepër, duke shkaktuar mbyllje të përkohshme dhe bllokime të mëdha trafiku.
Sulmet janë pjesë e një fushate më të gjerë ruse kundër infrastrukturës civile dhe industriale në Ukrainë. Gjatë javëve të fundit, goditjet kanë shënjestruar qendra logjistike, linja hekurudhore, qendra të të dhënave, depo të materialeve mjekësore dhe fabrika çeliku, krahas sulmeve të vazhdueshme ndaj sistemit energjetik të vendit, të cilat pritet të intensifikohen gjatë dimrit.
Ministria e Jashtme e Rusisë paralajmëroi të shtunën shtetasit e huaj dhe personelin diplomatik që të mos qëndrojnë apo udhëtojnë drejt Ukrainës.
“Përgjegjësia për çdo pasojë të mundshme negative bie tërësisht mbi ata që zgjedhin ta shpërfillin këtë paralajmërim”, deklaroi ministria.
Disa ambasadorë të huaj, përfshirë atë të Gjermanisë, reaguan në rrjetet sociale duke bërë të ditur se synonin të qëndronin në Kiev.
Në Moskë, disa komentatorë pro luftës shprehën kënaqësi që sulmet ruse vijuan edhe pas mbërritjes së Merz-it.
“Rusia dikur i ndërpriste sulmet ndaj Kievit gjatë vizitave të politikanëve evropianë. Jo më”, shkroi Sergei Markov, një komentator i njohur pro luftës.
Ky është udhëtimi i dytë i Merz-it në Ukrainë që kur mori detyrën e kancelarit. Ai është ndër mbështetësit më të zëshëm të Kievit në Evropë dhe një nga zërat kryesorë që paralajmërojnë për fushatën hibride të Rusisë kundër vendeve të tjera.
Muajin e kaluar, Gjermania akuzoi zyrtarisht Moskën se qëndronte pas një komploti të dyshuar që synonte aeroportin Leipzig/Halle, një qendër e rëndësishme logjistike për ndihmën ushtarake perëndimore drejt Ukrainës.
Megjithatë, Merz po përballet edhe me pakënaqësi në rritje brenda vendit për shkak të mbështetjes së tij për Ukrainën, ndërsa vlerësimet për të kanë rënë.
E majta dhe e djathta ekstreme në Gjermani janë skeptike ndaj mbështetjes për Ukrainën dhe kërkojnë që Berlini të reduktojë ndihmën. Presioni është shtuar pasi partia e ekstremit të djathtë, Alternativa për Gjermaninë (AfD), ka shënuar fitore të rëndësishme në zgjedhje.
Alice Weidel, bashkëkryetare e AfD-së, shkroi në rrjetet sociale:
“Merz po udhëton drejt Ukrainës në festën kombëtare të Gjermanisë dhe premton miliarda të tjera nga paratë e taksapaguesve gjermanë, të cilat mungojnë në fondet e pensioneve dhe të sigurimeve shëndetësore, ndërsa Gjermania është zhytur në krizën e saj më të rëndë energjetike.”
