Kryeministri Edi Rama ka prezantuar këtë të shtunë, përmes një lidhjeje të drejtpërdrejtë në rrjetet sociale, risitë që do të sjellë zhvillimi i shërbimeve digjitale në platformën e-Albania 4.0 dhe funksionet e reja të asistentit virtual Diella.
Sipas Ramës, Diella do të mundësojë ofrimin e deri në 19 shërbimeve, ndërsa një tjetër risi do të jetë identifikimi përmes syve, që synon të lehtësojë ndërveprimin e qytetarëve me platformën.
Gjatë komunikimit, kryeministri tha se asistenti virtual do të përpunojë kërkesat më shpejt dhe se qytetarët do të mund të marrin shërbimet brenda pak minutash. Ai theksoi se një vëmendje e veçantë do t’u kushtohet edhe pensionistëve.
“Diella kalon në një pozicion shumë aktiv, i bën më shpejt gjërat dhe duhet të presësh vetëm pak minuta që të vijë i gjithë shërbimi. Kemi një komponent shumë të rëndësishëm në e-Albania 4.0 që ka të bëjë me pensionistët. Diella është vetëm një klik larg dhe gjeneron deri në 19 shërbime”, u shpreh Rama.
Një tjetër risi e prezantuar nga kryeministri është identifikimi përmes syve, i cili, sipas tij, do ta bëjë më të lehtë përdorimin e shërbimeve digjitale.
Lexo gjithashtu
“Është shumë i rëndësishëm edhe identifikimi me sy, që lehtëson shumë ndërveprimin me e-Albania. Ka edhe surpriza të tjera në vijim. Por sot ramë dakord që t’u themi të gjithëve të njihen me fuqitë e reja të Diellës. E keni e-Albanian në dispozicionin tuaj me vetëm një komandë të thjeshtë dhe Diella bën të gjithë shërbimin”, deklaroi kryeministri.
