Përfaqësuesi i Posaçëm i Asamblesë Parlamentare të OSBE-së për Europën Juglindore, Claude Haagen, ka shprehur shqetësimin për zhvillimet e fundit në Shqipëri, duke bërë thirrje për uljen e tensioneve, respektimin e të drejtave themelore dhe zgjidhjen e situatës përmes dialogut.
Në deklaratën e tij, Haagen thekson se qytetarët duhet të gëzojnë të drejtën për të protestuar në mënyrë paqësore dhe për të shprehur lirisht qëndrimet e tyre. Njëkohësisht, ai nënvizon se mbrojtja e jetës dhe e pronës publike e private mbetet një detyrim i rëndësishëm i autoriteteve.
Përfaqësuesi i OSBE-së u bën thirrje të gjitha palëve të tregojnë përgjegjshmëri dhe të respektojnë parimet demokratike, duke theksuar se dhuna nuk mund të jetë zgjidhje për konfliktet dhe mosmarrëveshjet.
Haagen kërkon që çdo akt dhune nga protestuesit, si dhe çdo rast i përdorimit të tepruar të forcës nga policia, të hetohet dhe të trajtohet në përputhje me ligjet shqiptare dhe standardet ndërkombëtare për të drejtat e njeriut.
Një vëmendje e veçantë i kushtohet edhe sigurisë së gazetarëve gjatë raportimit nga protestat. Sipas Haagen, gazetarët duhet të ushtrojnë profesionin e tyre pa frikësim, presione apo pengesa të pajustifikuara, pasi liria e medias është thelbësore për transparencën dhe llogaridhënien.
Lexo gjithashtu
Në përfundim, përfaqësuesi i OSBE-së u bën thirrje qeverisë, opozitës, shoqërisë civile, studentëve dhe qytetarëve që të angazhohen në një dialog konstruktiv për kapërcimin e situatës.
Ai thekson se respektimi i shtetit të së drejtës, garantimi i lirive themelore dhe dialogu duhet të jenë rruga përpara, në mënyrë që tensionet të mos përshkallëzohen më tej.
