Ministrja e Ekonomisë dhe Inovacionit, Delina Ibrahimaj, ka reaguar lidhur me protestat në Tiranë, duke dënuar aktet e dhunës dhe djegien e institucioneve.
Përmes një mesazhi publik, ajo thekson se sulmet ndaj godinave institucionale nuk mund të konsiderohen protestë paqësore, pasi rrezikojnë drejtpërdrejt jetën e njerëzve.
“T’i vësh flakën një institucioni nuk është protestë paqësore. Është një akt që rrezikon jetë njerëzish”, shprehet Ibrahimaj.
Ajo nënvizon se institucionet janë hapësira që i shërbejnë shtetit dhe qytetarëve, pavarësisht se cila forcë politike është në pushtet. Sipas saj, në këto ambiente punojnë çdo ditë njerëz, prindër dhe të rinj, të cilët kanë familjet e tyre që i presin në shtëpi.
Ibrahimaj thekson se asnjë punonjës nuk duhet të vihet në rrezik në vendin e tij të punës dhe se pakënaqësitë politike apo shoqërore nuk mund të justifikojnë djegien e institucioneve publike.
Lexo gjithashtu
Në reagimin e saj, ajo rikujton gjithashtu se këto institucione u përkasin të gjithë qytetarëve dhe duhet të vazhdojnë t’u shërbejnë edhe brezave të ardhshëm.
REAGIMI I PLOTË
T’i vësh flakën një institucioni nuk është protestë paqësore. Është një akt që rrezikon jetë njerëzish.
Këto janë zyra që i shërbejnë shtetit dhe qytetarëve, pavarësisht se kush është në qeveri. Janë vende pune ku çdo ditë punojnë njerëz, prindër, të rinj, që kanë familje që i presin në shtëpi.
Asnjë punonjës nuk duhet të rrezikojë jetën në vendin e tij të punës. Asnjë pakënaqësi nuk mund të justifikojë djegien e institucioneve që u përkasin të gjithëve dhe që do t’u shërbejnë edhe brezave të ardhshëm.
