Ministri i Punëve të Brendshme, Ervin Demo, ka reaguar pas protestës së zhvilluar në Tiranë, duke dënuar aktet e dhunës, zjarrvëniet dhe dëmtimin e pronës publike e private.
Demo akuzoi forca politike dhe persona të tjerë se po shfrytëzojnë kauzën studentore për të nxitur kaos dhe pasiguri.
Ai u bëri thirrje të rinjve që kërkesat dhe shqetësimet e tyre t’i adresojnë përmes dialogut, duke theksuar se progresi nuk arrihet përmes dhunës dhe shkatërrimit.
Ministri iu drejtua veçanërisht studentëve, duke u shprehur se qeveria mbetet e hapur për dialog dhe për përmirësimin e kushteve në universitete. Në këtë kontekst, ai përmendi edhe Paktin për Universitetin, duke theksuar se kërkesat e reja mund të diskutohen përmes bashkëpunimit.
Një paralajmërim të drejtpërdrejtë Demo e pati për personat që kanë kryer akte të dhunshme, duke nënvizuar se ata do të mbajnë përgjegjësi individuale përpara ligjit.
Lexo gjithashtu
Në fund të reagimit, ministri falënderoi efektivët e Policisë së Shtetit për profesionalizmin dhe vetëpërmbajtjen gjatë protestës, ndërsa qytetarëve të Tiranës u kërkoi durim, duke siguruar se situata do të trajtohet me qetësi dhe vendosmëri.
