Kryeministri Edi Rama po zhvillon këtë të mërkurë një takim me drejtuesit e bankave në vend, pas dëmtimeve të shkaktuara në disa prej tyre gjatë protestave të zhvilluara në Tiranë.
Gjatë takimit, Rama i cilësoi ngjarjet e ditëve të fundit si një përshkallëzim të rëndë të dhunës, që sipas tij ushtroi presion mbi qytetarët dhe krijoi frikën e përhapjes së incidenteve në të gjithë vendin.
Kryeministri deklaroi se takimi me drejtuesit e bankave ishte i rëndësishëm pas asaj që e përshkroi si “një histeri dhune”, e cila, sipas tij, mori peng Tiranën dhe krijoi frikën se sulmet me gurë dhe zjarr mund të përhapeshin në të gjithë Shqipërinë.
“Natyrisht që nuk ka asnjë dyshim që është një dhunë e orkestruar nga elementë të brendshëm dhe të jashtëm”, u shpreh Rama.
Ai e lidhi situatën me zhvillimet në qytete dhe kryeqytete të tjera të Europës, duke iu referuar lëvizjes anarkiste “Antifa” dhe grupeve të tjera të radikalizuara të të rinjve.
Lexo gjithashtu
Në vijim, Rama kritikoi disa të rinj, të cilët sipas tij janë radikalizuar dhe bëjnë thirrje për burgosjen e personave që i konsiderojnë kundërshtarë. Ai përmendi gjithashtu kriminalitetin në lagje dhe periferi, për të cilin pretendoi se mbështetet nga krimi i organizuar dhe subjekte politike.
Kryeministri ngriti edhe shqetësimin për atë që e cilësoi si mbështetje nga forca të huaja, të cilat, sipas tij, synojnë destabilizimin e Shqipërisë dhe të Europës në tërësi.
Rama: Ishte shumë e rëndësishme që ta bënim këtë takim pas një histerie dhune që ushtroi presion ndaj njerëzve dhe mori peng Tiranën, duke krijuar frikën se mund të merrnin me gurë e flakë gjithë Shqipërinë.
Natyrisht që nuk ka asnjë dyshim që është një dhunë e orkestruar nga elementë të brendshëm dhe të jashtëm dhe është e lidhur me atë që ndodh në qytetet dhe kryeqytetet e tjera të Europës, përmes një lëvizjeje anarkiste neokomuniste që quhet Antifa dhe, njëkohësisht, edhe me pjesë të tjera të radikalizuara të rinisë.
Vajza dhe djem që janë të ekstremizuar dhe bëjnë thirrje si në kohën e Mesjetës dhe pasluftës për të burgosur këdo që e konsiderojnë si të keq. Nga ana tjetër, është edhe kriminaliteti i lagjeve dhe periferive që vjen me sponsorizimin e krimit të organizuar dhe të subjekteve politike, dhe të gjitha këto së bashku pastaj kanë një mbështetje të jashtëzakonshme që prodhohet dita-ditës nga forca të huaja që duan të destabilizojnë Shqipërinë dhe, në tërësi, të gjithë Europën.
