Byroja Federale e Hetimeve e SHBA-së (FBI) ka lidhur aktorë keqdashës nga Koreja e Veriut me vjedhjen e rreth 6,3 miliardë dollarëve në asete virtuale nga platforma e kriptomonedhave Binance, e cilësuar si një nga vjedhjet më të mëdha në historinë e kriptovalutave.
Në një deklaratë të publikuar të shtunën, FBI bëri të ditur se aktorët e dyshuar po pastronin asetet e vjedhura, kryesisht duke i konvertuar ato në kriptomonedhën Ethereum.
FBI identifikon grupin TraderTraitor
Agjencia amerikane ia atribuoi operacionin grupit të njohur si TraderTraitor, të cilin e ka fajësuar edhe për vjedhjen e rreth 1,5 miliardë dollarëve nga platforma Bybit, në shkurt të vitit të kaluar.
Sipas FBI-së, asetet e vjedhura pritet t’i nënshtrohen proceseve të mëtejshme të pastrimit të parave. Agjencia u bëri thirrje ofruesve të shërbimeve të aseteve virtuale të bllokojnë transaksionet e lidhura me operacionin dhe publikoi adresat dixhitale të dyshuara, me qëllim monitorimin e tyre.
Lexo gjithashtu
Binance: Kemi zëvendësuar 90 për qind të shumës së vjedhur
Në një deklaratë të veçantë, të publikuar të shtunën, Binance njoftoi se kishte zëvendësuar 90 për qind të shumës së vjedhur, duke përdorur fondet e kompanisë për të blerë tokenë të rinj.
Pjesa e mbetur, rreth 10 për qind, përbëhet nga tokenë me likuiditet më të ulët, çka mund ta bëjë më të vështirë dhe më të ngadaltë riblerjen e tyre.
“Ne do të vazhdojmë të blejmë asetet e mbetura përkatëse të tokenëve, derisa shuma e mbuluar të arrijë në 100 për qind për të gjithë tokenët. Binance do të përballojë ndikimin financiar të këtyre fondeve të vjedhura, jo përdoruesit tanë”, deklaroi kompania në rrjetin social X.
Sipas Binance, për riblerjen e tokenëve janë përdorur fondet e kompanisë, një pjesë e Fondit të Aseteve të Sigurta për Përdoruesit (SAFU), si dhe burime nga fondi i sigurimit të të ardhmes dhe thesari i korporatës.
Sulmi shkaktoi rënie të çmimeve të kriptomonedhave
Çmimet e kriptomonedhave shënuan rënie të premten, ndërsa Binance u përpoq të siguronte klientët se asetet e tyre ishin të mbrojtura.
Bashkëdrejtori ekzekutiv i kompanisë, Richard Teng, e përshkroi sulmin si një ndërhyrje të sofistikuar, që përfshinte një laptop të komprometuar dhe një program keqdashës të krijuar për të fshirë gjurmët e aktivitetit të tij, duke vështirësuar identifikimin dhe hetimin e autorëve.
Pas sulmit kibernetik, platforma pezulloi përkohësisht tërheqjet e fondeve nga klientët. Binance njoftoi më vonë se synonte të rikthente shërbimin e tërheqjeve të dielën.
Kompania bëri të ditur gjithashtu se kishte publikuar një raport të ri të provës së rezervave, përmes të cilit përdoruesit mund të verifikojnë në mënyrë të pavarur nëse asetet e tyre mbulohen në raportin minimal 1:1.
