Sot në Gjykatën e Posaçme kundër Korrupsionit dhe Krimit të Organizuar (GJKKO) do të mbahet seanca e radhës për kryetarin e Bashkisë së Tiranës, Erion Veliaj, dhe bashkëshorten e tij, Ajola Xoxa.
Seanca e planifikuar për 27 tetor u shty për shkak të mungesës së avokatëve. Në gjykatë nuk u paraqitën as mbrojtësit e ndihmës juridike falas, të kërkuar nga trupa gjykuese.
Përmes një kërkese të posaçme të paraqitur më herët, Veliaj ka bërë të ditur se dëshiron të përfaqësohet vetëm nga avokati Plarent Ndreca, duke refuzuar alternativën e mbrojtjes së ofruar nga gjykata.
Ndërkohë, pasditen e 28 tetorit, Veliaj u transferua nga paraburgimi i Durrësit në burgun e Fierit, me vendim të Drejtorisë së Përgjithshme të Burgjeve. Ky transferim shkaktoi reagime nga kryebashkiaku dhe pala e tij mbrojtëse, si dhe nga përfaqësues të Partisë Socialiste.
