Zbulohen të tjera detaje në lidhje me incidentin e shënuar pak ditë më parë gjatë fluturimit të një avioni të linjës Dubai-Tel Aviv, ku njëri nga pilotët sulmoi kapitenin me synimin për të rrëmbyer dhe më pas rrëzuar avionin.
Sipas mediave izraelite, qëllimi i pilotit oman ishte ta rrëzonte avionin në aeroportin Ben Gurion të Tel Avivit, Izrael, pasi të merrte lejen për ulje. Channel 12 ka zbuluar detaje nga marrja në pyetje e Hamam al-Hammami.
29-vjeçari planifikonte të merrte të gjitha lejet e nevojshme për ulje dhe të përplasej me një ndërtesë ose një avion tjetër në aeroportin e Izraelit.
Për më tepër, hetimi zbuloi se al-Hammami kishte zbritur disa herë në Aeroportin Ben Gurion, së fundmi në qershor dhe korrik, gjithmonë si pjesë e punës së tij me FlyDubai, dhe e kishte planifikuar sulmin për muaj të tërë.
Në qershor, ai thuhet se u përqendrua tërësisht në mbledhjen e të dhënave të inteligjencës. Sipas raportimeve, ai kishte menduar të kryente sulmin në korrik por në fund e anuloi planin në minutën e fundit sepse ishte mik me një nga anëtarët e ekuipazhit.
