Milani po punon për të siguruar vazhdimësinë e Adrien Rabiotit, me drejtuesit kuqezi që synojnë ta mbajnë mesfushorin francez pjesë të skuadrës deri në vitin 2030.
Sipas raportimit të gazetës italiane “La Gazzetta dello Sport”, si klubi, ashtu edhe futbollisti kanë interes për të vijuar bashkëpunimin. Kontrata aktuale e Rabiotit përfundon në vitin 2028, por Milani po shqyrton mundësinë e zgjatjes së saj edhe me dy sezone të tjera.
Negociatat pritet të nisin së shpejti me agjenten e lojtarit, Veronique Rabiot, e cila është njëkohësisht edhe nëna e tij.
Një nga pikat kryesore të diskutimit pritet të jetë aspekti financiar. Aktualisht, mesfushori përfiton rreth 3.5 milionë euro në sezon, ndërsa Milani po mendon t’i ofrojë një pagë prej 5 milionë eurosh në vit, pa llogaritur bonuset.
Në këtë mënyrë, drejtuesit e klubit synojnë të shmangin pasigurinë për të ardhmen e francezit dhe ta bëjnë atë një nga pikat e rëndësishme të projektit kuqezi në vitet e ardhshme.
