Komisioni i Posaçëm për Reformën Zgjedhore do të rinisë punën të hënën, më 9 nëntor, me një mbledhje ku do të diskutohen detyrimet që rrjedhin nga legjislacioni për vetëqeverisjen vendore, projektligji për financimin e partive politike dhe çështjet e mbetura të reformës.
Mbledhja do të zhvillohet në sallën “Pjetër Arbnori” të Kuvendit, ndërsa përpara saj, bashkëkryetari demokrat i komisionit, Oerd Bylykbashi, ka akuzuar Partinë Socialiste se po shmang rekomandimet e OSBE/ODIHR, të cilat, sipas tij, duhet të jenë përparësia kryesore e reformës. Bylykbashi theksoi se komisioni, i ngritur një vit më parë, ka hyrë në muajin e fundit të mandatit dhe se puna duhet të përqendrohet te garantimi i kushteve të barabarta të konkurrimit zgjedhor.
“Prioriteti absolut për garantimin e zgjedhjeve të lira dhe të ndershme është zgjidhja e problemit kryesor të evidentuar në raportin e OSBE/ODIHR, por edhe në raportet e Asamblesë Parlamentare të Këshillit të Europës, Parlamentit Europian dhe, së fundmi, Komisionit Europian: garantimi i kushteve të barabarta të konkurrimit zgjedhor. Kjo kërkon ndarjen reale të shtetit nga partia në pushtet, ndalimin e abuzimit me pushtetin, burimet shtetërore dhe administratën publike në favor të Partisë Socialiste apk cilësdo parti në pushtet në të ardhmen, si dhe garantimin e ndëshkimit të ashpër dhe efektiv të shkelësve, patronazhistëve dhe kujtdo që kryen krime zgjedhore” tha Bylykbashi.
Bashkëkryetari demokrat kërkoi gjithashtu ndryshimin e sistemit zgjedhor, duke propozuar proporcional kombëtar, lista të hapura dhe më pak barriera për partitë që duan të marrin pjesë në zgjedhje.
“Prioritet është edhe reforma rrënjësore e sistemit zgjedhor, të cilën e kërkon prej vitesh opozita por tashmë e kërkojnë prej muajsh edhe studentët dhe protestuesit. Shqipëria ka nevojë për një sistem krejtësisht të ri zgjedhor, ku përfaqësimi i partive të garantohet mbi bazën e proporcionalitetit kombëtar, me lista të hapura që u mundësojnë zgjedhësve të vendosin se cilët deputetë do t’i përfaqësojnë dhe me sa më pak barriera për partitë që duan të marrin pjesë në garë.Edhe këshillat bashkiakë duhet të zgjidhen me lista të hapura, në vend të listave të mbyllura që zbatohen që nga Kodi Zgjedhor i vitit 2000, i miratuar në mënyrë të njëanshme nga Partia Socialiste” tha Bylykbashi.
