Byroja Federale e Hetimit (FBI) ka arrestuar një person në SHBA, i dyshuar për publikimin e informacioneve tepër sekrete për mbrojtjen kombëtare në rrjetet sociale, si dhe për mbajtjen e paligjshme të materialeve të klasifikuara dhe vjedhjen e pajisjeve ushtarake.
Bëhet fjalë për James Thomas Ashbacher, i cili u vu në paraburgim pas ngritjes së akuzave federale për transmetim të paautorizuar të informacionit të mbrojtjes kombëtare, mbajtje të paligjshme të dokumenteve të klasifikuara dhe vjedhje të pronës qeveritare.
Sipas prokurorëve, Ashbacher dyshohet se publikoi të dhëna të sigurisë kombëtare në internet, mbajti materiale të mbrojtjes kombëtare në banesën e tij dhe vodhi pajisje për shikim natën nga Komanda e Operacioneve Speciale të Ushtrisë Amerikane.
Punonte për një kontraktor të ushtrisë amerikane
Ashbacher punonte për një kompani kontraktore që ofronte shërbime sigurie dhe menaxhimi emergjencash për ushtrinë amerikane në Fort Bragg, në Karolinën e Veriut. Ai zotëronte një leje sigurie të nivelit “Top Secret”, që i mundësonte akses në informacione të ndjeshme.
Lexo gjithashtu
Rasti i tij vjen gati dy vjet pas dënimit me 15 vjet burg të Jack Teixeira-s, ish-anëtar i Gardës Kombëtare Ajrore të Masaçusetsit, i cili pranoi fajësinë për nxjerrjen e dokumenteve ushtarake tepër të klasifikuara lidhur me luftën e Rusisë në Ukrainë.
Teixeira pranoi se kishte mbledhur në mënyrë të paligjshme dokumentet dhe i kishte shpërndarë ato te përdorues të tjerë në platformën Discord.
Hetimet vijojnë
Çështja e Ashbacher po hetohet nga zyra e FBI-së në Charlotte, në bashkëpunim me Divizionin e Hetimeve Penale të Departamentit të Ushtrisë Amerikane.
