Vodhën në pesë biznese dhe një automjet në Pogradec e Korçë, arrestohen dy 26-vjeçarë

Dy persona janë arrestuar, ndërsa një tjetër është shpallur në kërkim, pasi dyshohet se kanë kryer një seri vjedhjesh në biznese dhe automjete në Pogradec dhe Korçë.

Në pranga janë vënë dy shtetasit me inicialet R. M., të dy 26 vjeç, ndërsa në kërkim është shpallur shtetasi E. Ll.

Sipas Policisë, janë dokumentuar gjashtë raste vjedhjesh: pesë në biznese të ndryshme dhe një në një automjet. Ngjarjet kanë ndodhur në qytetet e Pogradecit dhe Korçës.

Të arrestuarit dyshohet se kanë marrë sende dhe materiale nga bizneset, si dhe sende të tjera nga automjeti.

Gjatë kontrolleve në banesat e dy të arrestuarve, policia gjeti dhe sekuestroi sendet e dyshuara të vjedhura, një shumë parash dhe një automjet që përdorej nga personat e dyshuar për të lëvizur.

Njoftimi i policisë:

Kryenin vjedhje në biznese të ndryshme në Pogradec dhe Korçë, si dhe në automjete, identifikohen, kapen dhe vihen në pranga 2 autorët e dyshuar.

Shpallet në kërkim bashkëpunëtori.

Sekuestrohen sendet e dyshuara të vjedhura.

Shërbimet e Komisariatit të Policisë Pogradec, në bashkëpunim me shërbimet e Komisariatit të Policisë Korçë, në vijim të punës për zbardhjen e vjedhjeve, identifikimin dhe kapjen e autorëve, organizuan punën, koordinuan veprimet dhe, në kuadër të operacionit policor të koduar “Qarku”, bënë të mundur zbardhjen e 6 vjedhjeve.

Në kuadër të operacionit, u kapën dhe u vunë në pranga shtetasit R. M., 26 vjeç, banues në fshatin Drenovë, dhe R. M., 26 vjeç, banues në Korçë.

Gjatë kontrollit të banesave të këtyre shtetasve, u gjetën dhe u sekuestruan, në cilësinë e provës materiale, sendet e vjedhura, së bashku me një shumë parash dhe një automjet me të cilin këta shtetas lëviznin.

Gjithashtu, u identifikua bashkëpunëtori i tyre, shtetasi E. Ll., banues në Kamëz, i cili u shpall në kërkim. Vijon puna për kapjen e tij.

Gjatë hetimeve rezultoi se këta shtetas dyshohet se janë autorë të vjedhjeve në 5 biznese dhe të disa sendeve në një automjet, vjedhje këto të ndodhura në Pogradec dhe Korçë.

Në bashkëpunim me Prokurorinë, vijon puna për dokumentimin ligjor edhe të disa vjedhjeve të tjera, që dyshohet se janë kryer nga këta shtetas.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprën penale “Vjedhja”, e kryer në bashkëpunim më shumë se një herë.