Ish-kandidati presidencial brazilian, Flavio Bolsonaro, deklaroi të premten se ishte larguar nga Brazili pas humbjes në zgjedhje, duke pretenduar se synonte t’i shpëtonte ndjekjes penale.
“Përndjekja filloi shumë më herët nga sa e imagjinoja”, tha senatori Bolsonaro në një video të publikuar në Instagram, ku iu referua vendimit për t’u larguar drejt Shteteve të Bashkuara.
Në video, ai tregoi se të hënën, pasi kishte vizituar të atin, ish-presidentin Jair Bolsonaro, i cili ndodhet në arrest shtëpiak, policia e kishte informuar se pasaportat e tij do të sekuestroheshin në kuadër të një hetimi për pastrim parash.
Flavio Bolsonaro nuk dha detaje se si arriti të largohej nga vendi. Ai tha se vendimin e kishte marrë së bashku me bashkëshorten, pa vënë në dijeni askënd tjetër.
“U largova për të mirën e Brazilit”, u shpreh ai.
Lexo gjithashtu
Flavio Bolsonaro, i cili nuk pranoi të njihte humbjen përballë presidentit të qendrës së majtë, Luiz Inácio Lula da Silva, në raundin e dytë të zgjedhjeve, foli për pretendime për “mashtrim zgjedhor”.
Këto pretendime janë kundërshtuar si nga partia e tij, ashtu edhe nga institucionet gjyqësore.
Në videon e publikuar, ai krahasoi parregullsitë e pretenduara zgjedhore me “golat e shënuar me dorë” që nuk anulohen nga sistemi VAR.
Ai parashikoi se Brazili do të “falimentonte” nën drejtimin e Lulës dhe u shpreh i gatshëm të kandidonte sërish për president.
“Nuk po flas për vitin 2030, por më shpejt”, deklaroi Flavio Bolsonaro.
