Një ngjarje e rëndë ka tronditur komunitetin shqiptar në Itali, ku 20-vjeçari Rogert Ajdini ka humbur jetën tragjikisht gjatë punës në një kantier në Valtopina.
I riu shqiptar, i cili jetonte në Trevi, ishte duke marrë pjesë në punimet për asfaltimin e rrugës “Santa Cristina”, kur rul asfaltuesi që drejtonte u përmbys, duke e zënë poshtë. Shkaqet që çuan në aksidentin fatal mbeten ende të paqarta.
Menjëherë pas ngjarjes, kolegët e tij dhe ekipet e emergjencës ndërhynë për t’i ardhur në ndihmë. Në vendngjarje mbërritën gjithashtu zjarrfikësit dhe helikopteri i shpëtimit, por, pavarësisht përpjekjeve, 20-vjeçari nuk mundi të mbijetonte për shkak të plagëve të rënda.
Ndërkohë, Karabinierët kanë nisur hetimet për të përcaktuar rrethanat e plota të aksidentit dhe shkaqet e përmbysjes së mjetit të rëndë.
Lajmi për vdekjen e të riut ka shkaktuar trishtim në komunitetin lokal. Kryetari i Bashkisë së Valtopinës, Gabriele Coccia, ka shprehur ngushëllimet për familjen e viktimës, e cila përballet me humbjen e parakohshme të të afërmit të tyre.
Lexo gjithashtu
Vdekja e Rogert Ajdinit vjen në një periudhë shqetësuese për sigurinë në vendet e punës në Itali. Sipas raportimit të cituar, brenda vetëm tri ditësh janë regjistruar shtatë viktima nga aksidente në punë, duke rikthyer në vëmendje nevojën për masa më të forta për mbrojtjen e punëtorëve.
