Kryetari i Partisë Demokratike, Sali Berisha, ka deklaruar se mijëra shqiptarë nga diaspora pritet t’i bashkohen protestës së gjimnazistëve dhe studentëve në Tiranë të shtunën e 31 tetorit. Ai u ka bërë thirrje qytetarëve të kryeqytetit të marrin pjesë në tubim, të cilin e cilësoi si një revoltë me rëndësi të veçantë për të ardhmen e vendit.
Berisha vlerësoi qëndrimin e të rinjve, duke e përshkruar protestën e tyre si një reagim të pazakontë dhe duke theksuar se, sipas tij, ata po përballen me policinë me guxim të madh.
Në deklaratën e tij, kreu i PD-së përdori tone të ashpra ndaj efektivëve të policisë, të cilët i akuzoi për dhunë ndaj protestuesve. Ai pretendoi se gjimnazistët dhe studentët kanë fituar simpatinë e qytetarëve shqiptarë dhe të opinionit ndërkombëtar.
Berisha: Sot nga mbarë Evropa, mijëra dhe mijëra shqiptarë nga diaspora pritet t’iu bashkohen protestës, revoltës së gjimnazistëve dhe studentëve të Tiranës.
Jam këtu për të bërë thirrje të gjithë qytetarëve të kryeqytetit që të bashkohen me këtë protestë, me këtë revoltë të një rëndësie të jashtëzakonshme për të ardhmen e këtij vendi.
Gjimnazistët dhe studentët po protestojnë në një revoltë të paparë, me një trimëri të jashtëzakonshme.
Tirana dhe Shqipëria nuk ka parë vajza dhe djem trima si ata, të cilët siç keni parë të gjithë, përballen dhëmb për dhëmb pa iu shkrepur syri me narkobanditë me uniformë, me narkobanditë të droguar, me kriminelë vrasës me pagesë dhe kanë fituar një simpati të madhe në mbarë shqiptarët.
Por kanë fituar një simpati të madhe në mbarë botën.
