Bashkëkryetari i Komisionit të Posaçëm për Reformën Territoriale, nga foltorja e Kuvendit, Arbjan Mazniku, i bëri thirrje opozitës që të përfshihet në diskutimet për reformën e pushtetit vendor. Mazniku kritikoi mungesën e opozitës në mbledhjet e komisionit, duke deklaruar se për shkak të kësaj situate u humb një pjesë e konsiderueshme e mandatit të tij.
Ai tha se, pavarësisht mungesës së opozitës, komisioni vijoi punën në 12 qarqe, ku sipas tij u zhvilluan dëgjesa me kryetarët e bashkive dhe u angazhuan grupe ekspertësh për të analizuar elementet teknike të reformës.
Mazniku u shpreh se debati nuk duhet të fokusohet vetëm te ekzistenca apo shkrirja e njësive administrative në hartë, por te mënyra se si bashkitë u ofrojnë shërbime qytetarëve.
Sipas Maznikut, reforma duhet të lidhet drejtpërdrejt me shërbime si pastrimi dhe ndriçimi i lagjeve, mirëmbajtja e kanaleve kulluese, rrugët rurale, çerdhet, kopshtet dhe transporti publik.
Duke iu referuar reformës territoriale të vitit 2014, Mazniku e cilësoi atë si një sukses, duke argumentuar se bashkitë u forcuan, u rritën të ardhurat dhe fuqia e tyre investuese, ndërsa borxhet u ulën.
Lexo gjithashtu
Mazniku: Nuk erdhën të bënim mbledhjen e parë për 112 ditë. U dogj 41% e kohës dhe mandatit që komisioni kishte. Në vijimësi ia dolëm me sukses të shkonim në 12 qarqe, të thërrisnim të gjithë kryetarët e bashkive. Patëm grup ekspertësh të përbashkët që duhej të sillnin elementet teknike. Më 15 korrik nuk u ra dakord që të prezantoheshin gjetjet. Në këtë moment u gjendëm në një situatë ku rrugët ndaheshin: ose reforma ngecte, ose puna, dëgjesat dhe, më e rëndësishmja, hallet që njerëzit kanë çdo ditë. Të fillojmë punën së bashku për kompetencat, financat dhe analizimin
Kur bashkohemi, bëhemi më të fortë. U thatë njerëzve që bashkitë tuaja do të zhduken, do të shkrihen. Njerëzit nuk jetojnë në hartë, jetojnë në shtëpinë e tyre, ku duan që t’u shkojë rruga, uji. Njerëzit jetojnë në lagjen e tyre, që duan t’u pastrohet dhe t’u ndriçohet. Njerëzit jetojnë në fshatin e tyre, ku duan kanale kulluese e rrugë për arat. Jetojnë në qytete, ku duan që të ketë çerdhe, kopshte dhe transport publik.
A ishte reforma e vitit 2014 një sukses? Në të gjitha dëgjesat, nga të gjitha diskutimet, po, reforma e vitit 2014 ishte sukses. Asnjë person i PD-së, asnjë person nuk tha: duam mbrapsht komunat. Ajo situatë, as propozimi i 100 bashkive, nuk tregon që ajo që kishim ishte mirë. Ajo që erdhi tregoi qartë se bashkitë u forcuan, të ardhurat u rritën, borxhet u ulën, fuqia investuese e bashkive u rrit.
Por kjo është e pamjaftueshme për aspiratën që PS ka për mënyrën se si u shërbehet qytetarëve në territor. Kjo është përgjigjja për arsyen përse ne na duhet të ecim përpara
