Kryeministri Edi Rama ka prezantuar gjashtë programet e reja që do të përfshihen në Programin Kombëtar të Strehimit për Shqipërinë, “Rilindja 2.0”.
I pranishëm në eventin e prezantimit të programit, Rama tha se qeveria do t’i adresojë të gjashtë programet së bashku, duke ndryshuar qasjen ndaj politikave të strehimit.
Programi i parë është ai i banesave sociale me qira. Sipas Ramës, bëhet fjalë për një skemë të njohur, e cila është përdorur prej vitesh, por që tashmë do të zbatohet në një mënyrë të re.
“Janë 6 programe të reja, të cilat ne do t’i adresojmë të gjitha së bashku. Programi i parë është programi i banesave sociale me qira. Është një skemë e miënjohur e përdorur në vite, por të cilën ne do ta qasim në një mënyrë të re.”
Lexo gjithashtu
Programi i dytë lidhet me banesat me kosto të ulët. Rama shpjegoi se në këtë skemë parashikohet subvencionimi nga shteti i kredisë, në mënyrë që banesa e kredituar të përfshihet në kategorinë e banesave me kosto të ulët.
“Banesa me kosto të ulët që është një tjetër program dhe lidhet me subvensionin nga ana e shteti të kedisë, duke pasur parasysh që banesa e kredituar të hyjë në kategorinë e banesave me kosto të ulët. Për këtë ka një kategorizim të mirëpërcaktuar me kritere të mirëpërcaktuara.”
Një tjetër program do të fokusohet te përmirësimi i banesave ekzistuese për grupet vulnerabël. Në këtë kuadër parashikohet edhe një projekt i veçantë infrastrukturor për përshtatjen e banesave të caktuara si banesa sociale.
“Përmirësimi i banesave ekzistuese për grupet vulnerabël si dhe një projekt i veçantë infrastrukture për të adaptuar banesa të caktuara si banesa sociale.”
Rama u ndal edhe te zhvillimi i zonave të strehimit, duke theksuar se ky program nuk do të kufizohet vetëm te familjet në nevojë, por do t’u drejtohet të gjitha shtresave të shoqërisë.
Sipas kryeministrit, synimi është që të shmanget krijimi i zonave të izoluara vetëm për familjet me të ardhura të ulëta dhe të ndërtohen hapësira të denja banimi për të gjithë.
“Zhvillimi i zonave të strehimit. Këtu nuk flasim vetëm për banesa sociale, vetëm për ata në nevojë, por flasim për të gjitha shtresat e shoqërisë. Nuk duam të ndërtojmë një bllok banimi vetëm për njerëz të varfër, por dua të kemi blloqe banimi diznjitoze për të gjitha shtresat.”
Programi i pestë është ai i banesave të përkohshme. Rama tha se do të ndërtohen banesa të tilla për njerëzit që preken nga fatkeqësitë natyrore, duke përmendur përmbytjet dhe zjarret si disa prej situatave me të cilat mund të përballen qytetarët.
“Programi tjetër është proigrami i banesave të përkohshme. Do të na duhet të ndërtojmë banesa të përkohshme për njerëzit e prekur nga fatkeqësitë natyreore. Këto të fundit janë bashkëudhëtare të jetës së këtij planeti. Përmbytjet, zjarret.”
Ndërsa programi i gjashtë do të fokusohet te banesat e veçanta, të përshtatura për personat me aftësi të kufizuara.
“Programi 6 është programi i atyre që mund t’i quajme banesa të veçanta. Janë banesa të përshtatura për personat me aftësi të kufizuara.”
