Ministrja e Arsimit, Mirela Kumbaro, ka bërë thirrje për mësues, artistë, artizanë dhe profesionistë të fushave të ndryshme që të bëhen pjesë e Programit “Pas Shkolle”, i cili këtë vit do të shtrihet në 408 shkolla në të gjithë Shqipërinë.
Nga shkolla “Andrea Stefani” në Tiranë, Kumbaro bëri me dije risitë e programit për vitin e ri shkollor dhe njoftoi hapjen e thirrjes për trajnuesit që do të angazhohen në zhvillimin e aktiviteteve pas përfundimit të orarit mësimor. Programi synon t’u ofrojë nxënësve mundësi për të mësuar, argëtuar dhe zhvilluar talentet e tyre përmes një sërë aktivitetesh, ndër të cilat “Bëjmë detyrat e shtëpisë”, muzikë, teatër, kërcim, zeje, arte pamore dhe sport.
“Këtë vit e shtrijmë Programin ‘Pas Shkolle’ në 408 shkolla të Shqipërisë dhe sot hapim thirrjen për trajnerët e rinj që do të bëjnë të realizueshëm këtë program, i cili kalon nga faza eksperimentale në një shtrirje më të madhe”, u shpreh Kumbaro.
Ministrja Kumbaro theksoi se pjesë e ekipit të trajnuesve nuk do të jenë vetëm mësuesit në detyrë, por edhe mësuesit në pension, mësuesit në listëpritje nga portali, si dhe profesionistë të tjerë që kanë eksperiencë në fushat e parashikuara nga programi.
“Janë jo vetëm mësuesit që mund të marrin pjesë dhe të bëhen pjesë e listës së trajnerëve për Programin ‘Pas Shkolle’, por edhe mësues në pension, mësues që janë në listën e pritjes, madje edhe kolegë të tjerë që mund të jenë artistë, artizanë apo profesionistë në fushat që janë parashikuar në programin e ri tashmë të konsoliduar të ‘Pas Shkollës’”. Në arsimin fillor, programi do të përfshijë edhe mbështetjen për kryerjen e detyrave të shtëpisë, ndërsa aktivitetet e tjera do të fokusohen në artizanat, arte pamore, teatër, muzikë dhe sport”, bëri me dije Kumbaro.
Lexo gjithashtu
Ministrja e Arsimit nënvizoi se “Pas Shkolle” nuk është thjesht një program për të angazhuar fëmijët pas mësimit, por synon të krijojë një hapësirë sociale dhe edukative, duke zhvilluar njëkohësisht komunikimin dhe ndërveprimin social, larg ekraneve dhe teknologjisë.
“Me Programin ‘Pas Shkolle’ synojmë të krijojmë një hapësirë socializimi dhe zhvillimi, ku nxënësit jo vetëm marrin njohuri, zbulojnë talentet dhe zhvillojnë potencialin e tyre, por kalojnë edhe orë cilësore larg ekraneve. Nuk është thjesht një mënyrë për të mbajtur fëmijët në shkollë dhe për t’i çliruar prindërit nga kujdesi për ta, por është edhe një program social për t’i ndihmuar prindërit. Nëpërmjet këtij programi kombinohen edukimi dhe zbavitja. Janë orë jo vetëm të lira për prindërit, jo vetëm me fëmijët në shkollë dhe të sigurt, por janë orë që i largojnë fëmijët nga ekrani”, u shpreh ministrja.
Thirrja për trajnuesit është e hapur pranë zyrave vendore arsimore nga 1 deri më 10 shtator. Të gjithë profesionistët që përmbushin kriteret e përcaktuara mund të aplikojnë për t’u bërë pjesë e ekipit të trajnuesve të Programit “Pas Shkolle”, i cili këtë vit do të zbatohet në 408 shkolla në të gjithë vendin.
