Kryeministri Edi Rama gjatë episodit të radhës të podkastit “Flasim”, ka vlerësuar zhvillimin e Malësisë së Madhe dhe Përmetit, duke deklaruar se këto dy zona, të cilat sipas tij 10 vite më parë perceptoheshin si vende të largëta dhe pa arsye për t’u vizituar, sot janë kthyer në destinacione të Shqipërisë së re.
Rama kujtoi periudhën përpara se të merrte detyrën e kryeministrit, kur, sipas tij, të dyja zonat përballeshin me mungesë perspektive dhe vizitoheshin kryesisht për arsye familjare, si dasma apo raste mortore.
“Qoftë Malësia e Madhe, qoftë Përmeti ishin ndër ato pika në hartën e Shqipërisë që dukeshin shumë larg dhe nga ana tjetër, ku dukej për së largu, pa shkuar, që s’kishte asnjë arsye për të shkuar”, u shpreh kreu i qeverisë.
Kryeministri tha më tej se sot këto zona përfaqësojnë një realitet tjetër, duke i cilësuar si pjesë të Shqipërisë që, sipas tij, është transformuar gjatë viteve të fundit. Ai theksoi se ndryshimet janë rezultat i punës së bërë, ndërsa komentoi edhe kritikat dhe protestat e zhvilluara në bulevardin përpara Kryeministrisë.
“Sot janë dy destinacione të Shqipërisë së re, Shqipërisë tjetër që kemi ndërtuar me shumë mund, ndërkohë që nga bulevardi i Tiranës shumëçka mbulohet me retë artificiale të kanaleve sociale dhe të ekraneve”, deklaroi Rama.
