Një regjistrim audio i publikuar së fundmi në mediat e Kosovës zbulon bisedën mes Arlinda Zekajt dhe zyrtarit policor Faruk Muçolli, disa ditë para vrasjes së saj.
Në bisedën e transmetuar në emisionin MAT, Zekaj dëgjohet duke kërkuar zbatimin e vendimit për urdhër mbrojtjeje ndaj ish-bashkëshortit të saj. Ajo shpreh gjithashtu shqetësimin për gjendjen e djalit dhe për atë që e konsideron mosveprim të institucioneve.
Gjatë komunikimit, zyrtari policor dëgjohet t’i thotë se nuk është i detyruar të merret me rastin e saj, duke përdorur edhe shprehje si “Jemi lodhë me ty”.
Në një pjesë të regjistrimit, Arlinda Zekaj thotë se është e shqetësuar për gjendjen e djalit të saj dhe pretendon se institucionet nuk kanë ndërmarrë veprimet e nevojshme.
Regjistrimi:
Lexo gjithashtu
Arlinda Zekaj: Unë jam e interesuar, kur e pashë djalin që është shkatërruar shëndeti mendor i djalit tem, s’keni vepru kurrgjë.
Faruk Muçolli: Sa herë shkove në Inspektorat ti për këtë situatë?
Arlinda Zekaj: Edhe miliona herë. Edhe flej aty.
Faruk Muçolli: A ke paraqitë kërkesë ndaj neve? A ke paraqit?
Arlinda Zekaj: Nuk di unë, jo, s’di unë.
Faruk Muçolli: Nuk din? Sa herë më thirr Inspektorati, unë i them le të paraqesë ankesë me shkrim. Të kam thënë edhe atë ditë: unë s’jam i obligum me u marrë me ty, se kam obligime. Sa herë po vjen e po e lyp Farukin, po të del Faruki. Nuk jam i obligum, bindu se nuk jam.
Arlinda Zekaj: Faruk, unë jam lodhë. Duhet me zbatu aktvendimin, kaq shumë e thjeshtë është.
Në një tjetër moment të bisedës, Arlinda Zekaj shpreh frikën se mund të vritej dhe paralajmëron se zyrtarët do të mbanin përgjegjësi.
“Të lutem, unë vrahna, po ju do të përgjigjeni”, dëgjohet të thotë ajo.
Nga ana tjetër, togeri Faruk Muçolli i përgjigjet se nuk e ka detyrim të merret më me rastin e saj.
“Unë ty nuk ka me të pranu më, nuk e kam obligim”, dëgjohet të thotë ai.
