SPAK, njoftim zyrtar për Ballukun: I komunikuam 5 akuza, mes tyre korrupsion dhe fshehje pasurie

Prokuroria e Posaçme kundër Korrupsionit dhe Krimit të Organizuar (SPAK) ka dalë me një njoftim zyrtar, duke bërë të ditur se sot i ka komunikuar Belinda Ballukut akuzat përfundimtare në kuadër të çështjes penale ndaj saj.

Sipas SPAK, ish-zëvendëskryeministres dhe ish-ministres së Infrastrukturës i janë komunikuar pesë kategori akuzash, që përfshijnë shkeljen e barazisë në tendera, korrupsionin, mosdeklarimin e pasurisë dhe pastrimin e produkteve të veprës penale.

Sipas njoftimit zyrtar, akuzat ndaj Ballukut janë: Shkelje e barazisë së pjesëmarrësve në tendera apo ankande publike, Korrupsion pasiv i personave që ushtrojnë funksione publike, Korrupsion pasiv i funksionarëve të lartë shtetërorë ose i të zgjedhurve vendorë, Refuzim, mosdeklarim, fshehje ose deklarim i rremë i pasurisë dhe interesave private, Pastrimi i produkteve të veprës penale ose i veprimtarisë kriminale.

Në njoftimin e saj, Prokuroria e Posaçme bën të ditur se po vijon veprimet procedurale për t’ua komunikuar akuzat edhe personave të tjerë të përfshirë në të njëjtën çështje penale.

Njoftimi i plotë:

Lexo gjithashtu

Trump uron demokratët për fitoren, por paralajmëron veto ndaj ligjeve të tyre

Rama përsërit ftesën për dialog me studentët, protestuesit vijojnë refuzimin

Zgjedhjet e mesmandatit në SHBA, ja si ndahen vendet në Senat dhe në Dhomën e Përfaqësuesve

Mullin paralajmëron hetim pas zgjedhjeve të mesmandatit në SHBA për votimin nga joqytetarët

Prokuroria e Posaçme kundër Korrupsionit dhe Krimit të Organizuar i ka komunikuar sot, më 20.10.2026, të pandehurës Belinda Balluku akuzat përfundimtare për veprat penale të mëposhtme:

“Shkelje e barazisë së pjesëmarrësve në tendera apo ankande publike”, në bashkëpunim (nëntë herë), parashikuar nga neni 258/2 e 25 i Kodit Penal.
“Korrupsion pasiv i personave që ushtrojnë funksione publike”, e parashikuar nga neni 259 i Kodit Penal.
“Korrupsion pasiv i funksionarëve të lartë shtetërorë ose i të zgjedhurve vendorë”, i parashikuar nga neni 260 i Kodit Penal.
“Refuzim për deklarimin, mosdeklarimin, fshehjen ose deklarimin e rremë të pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, (dy herë), parashikuar nga neni 257/a, paragrafi i 2-të i Kodit Penal.
“Pastrim i produkteve të veprës penale ose i veprimtarisë kriminale”, parashikuar neni 287, gërma “b” i Kodit Penal, e kryer në rrethana cilësuese “në bashkëpunim dhe më shumë se një herë”, sipas nenit 287/2 të Kodit Penal (për dy pasuri të paluajtshme).

Prokuroria e Posaçme po vijon veprime konkrete procedurale për t’i komunikuar akuzat edhe personave të përfshirë në të njëjtën çështje penale. Detaje të tjera do të bëhen të ditura në një moment të mëvonshëm.