Ministri i Financave, Petrit Malaj prezantoi sot në Komisionin për Ekonominë, Punësimin dhe Financat, projektligjin “Për Buxhetin e vitit 2027” dhe projektligjet e paketës fiskale. Malaj tha se një nga prioritetet kryesore të qeverisë vijon të jetë mbështetja për moshën e tretë ku pensionet zënë një vend të veçantë në prioritetet e buxhetit.
Ministri theksoi se me buxhetin 2027 parashikohet indeksimi i pensioneve në prill 2027, me një fond prej rreth 1,35 miliardë lekësh. Gjithashtu, Malaj bëri me dije se do ketë dyfishim të vlerës së bonusit mujor për pensionistët sipas kategorive të përcaktuara, duke filluar nga 1 janari 2027, me një kosto totale të parashikuar prej 20 miliardë lekësh për vitin.
“Pozitat e qëndrueshme të ekonomisë shqiptare janë vlerësuar edhe nga ekonomitë ndërkombëtare të vlerësimit. Një nga prioritetet e buxhetit 2027 do të jetë mbështetja për moshën e tretë. Parashikohet indeksimi i pensioneve dhe afrimi i këtij indeksimi në muajin prill 2027, një politikë që kërkon një fond shtesë nga buxheti të parashikuar në masën 1.35 miliardë lekësh. Në total, kosto për indeksimin e pensioneve plus afrimin në kohë të këtij indeksimi, i kushton buxhetit të shtetit 40 milionë euro. Do të kemi dyfishim të vlerës së bonusit mujor për pensionistët, duke nisur nga 1 janari 2027, me një kosti 20 miliardë lekësh”, tha Malaj.
Në fjalën e tij, Malaj tha se buxheti i vit të ardhshëm forcon edhe politikat e mbrojtjes sociale, me fokus te fëmijët, familjet dhe kategoritë më në nevojë. Ministri tha se parashikohet dyfishimin e pagesave për fëmijët me aftësi të kufizuara, si dhe njohja e kontributeve të sigurimeve shoqërore dhe shëndetësore për kujdestarët e tyre. Ai shtoi se do vijojë bonusi i bebeve, por këtë herë përmes mbështetjes mujore deri në moshën 5 vjeç, ku vlera rritet progresivisht për fëmijën e parë, të dytë dhe të tretë.
“Dyfishim i pagesave për fëmijët me aftësi të kufizuara dhe njohja e kontributeve të sigurimeve shoqërore e shëndetësore për kujdestarët e tyre. Do të vijojmë me bonusin e bebeve, përmes mbështetjes mujore deri në moshën 5 vjeç, ku vlera do të rritet progresivisht përmes fëmijës së parë, të dytë dhe të tretë. Për vitin 2027, vetëm për mbrojtjen sociale, financimi nga Buxheti i Shtetit arrin në masën e 279.7 miliardë lekë, ose rreth 30% e shpenzimeve të përgjithshme buxhetore. Arsimi do të vijojë të jetë një investim i drejtpërdrejtë i kësaj qeverie për të ardhmen e vendit. 1.1 miliardë lekë shkojnë për rritjen e bursave për studentët në nevojë”, shtoi Malaj.
