Kryeministri Edi Rama ka përsëritur edhe këtë të mërkurë ftesën për dialog drejtuar studentëve, të cilët prej disa javësh vijojnë protestat kundër qeverisë dhe kërkojnë dorëheqjen e tij.
Edhe këtë herë, kreu i qeverisë ka publikuar një mesazh përmes tryezës prej guri, ku ka vendosur shënimet me mbishkrimin “Dialog”.
Ftesa e Ramës vjen në një kohë kur studentët kanë refuzuar më herët dialogun me kryeministrin dhe kanë këmbëngulur në kërkesën për largimin e tij nga detyra.
Prej disa javësh, studentët protestojnë në Tiranë, ndërsa lëvizjes u janë bashkuar edhe pedagogë, të cilët kanë shprehur mbështetje për kërkesat e tyre. Në shenjë kundërshtimi, studentët dhe një pjesë e pedagogëve kanë bojkotuar procesin mësimor.
Protestuesit vijojnë marshimet në rrugët e kryeqytetit dhe ndalesat në fakultete të ndryshme, ku u bëjnë thirrje edhe studentëve të tjerë t’i bashkohen protestës dhe bojkotit të mësimit
