Ministri i Brendshëm, Ervin Demo, deklaroi se Policia e Shtetit po përparon në identifikimin e personave të dyshuar për përfshirje në aktet e dhunës gjatë protestave të ditëve të fundit, përmes analizimit të pamjeve filmike dhe përdorimit të teknologjisë.
Sipas tij, autoritetet kanë në dispozicion qindra orë regjistrime nga kamera publike dhe burime të tjera, përfshirë pamjet e publikuara në rrjetet sociale.
“Janë qindra orë filmimi nga burime të ndryshme, por përmes teknologjisë kemi avancuar me shpejtësi sa i përket identifikimit të personave të dhunshëm, të cilët janë filmuar nga kamerat publike apo në pamjet që kanë hedhur në rrjetet sociale”, u shpreh Demo.
Ministri theksoi se Policia e Shtetit do të vijojë punën për identifikimin dhe vënien para përgjegjësisë të personave që dyshohet se kanë dëmtuar pronën publike dhe private gjatë protestave.
“Policia e Shtetit do të punojë për të vënë para përgjegjësisë të gjithë ata që kanë cenuar pronën publike e private dhe po e bën më shpejt e më saktë”, deklaroi ministri i Brendshëm.
