Ministri i Punëve të Brendshme, Ervin Demo, mori pjesë në Takimin Ndërkombëtar të Nivelit të Lartë për Parandalimin e Varësive dhe Rehabilitimin, të zhvilluar në San Patrignano të Italisë. Në aktivitet ishte e pranishme edhe kryeministrja italiane, Giorgia Meloni, së bashku me homologë nga vende të tjera evropiane.
Në fokus të takimit ishte nevoja për një qasje gjithëpërfshirëse ndaj luftës kundër drogës, duke ndërthurur sigurinë dhe zbatimin e ligjit me parandalimin e varësive, mbrojtjen e të rinjve dhe mbështetjen për rehabilitimin dhe riintegrimin në shoqëri të personave që përballen me varësinë.
Përballja me këtë fenomen kërkon përgjegjësi të përbashkët, bashkëpunim ndërkombëtar dhe politika të qëndrueshme, të cilat synojnë jo vetëm luftën kundër trafikimit dhe shpërndarjes së drogës, por edhe parandalimin e pasojave sociale dhe shëndetësore të varësive.
Përmes një postimi në rrjetet sociale, Demo theksoi rëndësinë e parandalimit, rehabilitimit dhe riintegrimit si pjesë të një strategjie afatgjatë.
“Parandalimi, rehabilitimi dhe riintegrimi përbëjnë elemente thelbësore të një strategjie afatgjatë, me në qendër mbrojtjen e të rinjve dhe krijimin e mundësive konkrete për një jetë të shëndetshme e të sigurt”, shkroi ministri.
