Kryetari i Partisë Demokratike, Sali Berisha, u ka bërë thirrje qytetarëve në të gjithë vendin që të mobilizohen për mosbindje civile, në mbështetje të protestës së studentëve dhe gjimnazistëve. Berisha shprehu solidaritet me të rinjtë dhe protestuesit, pavarësisht bindjeve politike, duke i ftuar qytetarët të bashkohen në revoltën kundër qeverisë së kryeministrit Edi Rama.
Kreu i PD-së u bëri thirrje demokratëve dhe qytetarëve në të gjitha rrethet që të mobilizohen për mosbindje civile, të cilën e cilësoi si mbështetjen më të rëndësishme për studentët dhe gjimnazistët. Berisha ftoi gjithashtu qytetarët që të udhëtojnë drejt Tiranës për t’iu bashkuar protestës së paralajmëruar për ditën e nesërme.
“Ndërsa, për qytetarët që mund të vijnë në Tiranë nesër, të vërshojnë drejt kryeqytetit. Këtu është logu, këtu është sheshi, ku fitorja do firmoset nga qytetarët shqiptarë”, tha Berisha.
Në përfundim të mesazhit të tij, kreu i opozitës përsëriti thirrjen për mobilizim qytetar, duke kërkuar që protesta të shërbejë si presion ndaj qeverisë së Edi Ramës.
Berisha: Ndërkohë, shpreh solidaritetin tim me të gjithë qytetarët, të rinjtë, studentët, demokratë, pa parti, socialistë, çfarëdo qofshin në këtë protestë. U bëj thirrje qytetarëve, edhe si një akt përgjegjësie të vonuar, edhe si një akt detyrimi prindëror ndaj këtyre të rinjve, edhe si një akt detyrimi qytetar për të rikthyer në këtë vend shpresën e ligjit, liritë, të drejtat e shqiptarëve, të solidarizohen me revoltën si rruga më e sigurt e zgjidhjes më të shkëlqyer, por dhe si rruga e drejtë e historisë. Ju bëj thirrje demokratëve, demokratëve dhe mbarë qytetarëve në të gjitha rrethet të mobilizohen me të gjithë potencialin e tyre për mosbindje civile.
Mosbindja civile në çdo rreth është ndihma më e çmuar për studentët, luftëtarë të lirisë. Për studentët, për gjimnazistët, heronj të vërtetë. Këtij regjimi të urryer duhet t’i dridhet toka nën këmbë në çdo metër katror të territorit të këtij vendi. Ndërsa, për qytetarët që mund të vijnë në Tiranë nesër, të vërshojnë drejt kryeqytetit. Këtu është logu, këtu është sheshi, ku fitorja do firmoset nga qytetarët shqiptarë. Edhe një herë, thirrja ime: të gjithë në këmbë, për t’i dhënë ndëshkimin e merituar këtij regjimi të urryer për shqiptarët. Faleminderit.
