Ambasadori i ri i Shteteve të Bashkuara të Amerikës në Shqipëri, Eric Wendt, ka zhvilluar takimin e parë me kryeministrin Edi Rama, pas nisjes zyrtare të misionit të tij diplomatik në vendin tonë.
Përmes një postimi në Facebook, ambasada bën me dije se në takim ata diskutuan për thellimin e bashkëpunimit në fushën e mbrojtjes, zgjerimin e tregtisë dhe investimeve, si dhe forcimin e luftës kundër krimit të organizuar.“Një partneritet i fortë matet nga ajo që dy kombe arrijnë së bashku. Ambasadori Eric Wendt u takua sot me Kryeministrin Edi Rama për të diskutuar thellimin e bashkëpunimit në fushën e mbrojtjes, zgjerimin e tregtisë dhe investimeve, si dhe forcimin e luftës kundër krimit të organizuar,” shkruan Ambasada.
Wendt mbërriti në Shqipëri për të marrë detyrën e re dhe më 26 shtator i dorëzoi letrat kredenciale Presidentit Bajram Begaj, duke formalizuar kështu fillimin e mandatit të tij si përfaqësues diplomatik i SHBA-së.
Eric Wendt është ambasadori i 11-të amerikan në Shqipëri që prej vitit 1991, kur Shtetet e Bashkuara dhe Shqipëria rivendosën marrëdhëniet diplomatike.
Pas këtij takimi, ka reaguar edhe vetë Kryeministri Rama, i cili shkruan: “Takimi i mirëseardhjes së Ambasadorit të ri amerikan në Tiranë, Eric Wendt”.
