Aeroporti Modlin i Varshavës është mbyllur pas një alarmi për bombë në bordin e një avioni të kompanisë ajrore polake LOT, i cili po fluturonte nga Londra drejt kryeqytetit polak.
Sipas njoftimit zyrtar të aeroportit, avioni i tipit Boeing 737 MAX, me 181 persona në bord, kreu një ulje të paplanifikuar në Modlin, në vend të aeroportit të Varshavës Okęcie.
Bëhet fjalë për fluturimin LO286 nga aeroporti Heathrow i Londrës. Autoritetet konfirmuan se avioni u ul në mënyrë të sigurt dhe se nuk pati probleme gjatë uljes. Pas alarmit, shërbimet e sigurisë kanë nisur procedurat për kontrollin e plotë të avionit, për të verifikuar nëse ekziston ndonjë rrezik.
Aeroporti Modlin, i vendosur në veri të Varshavës, ka njoftuar se do të qëndrojë i mbyllur deri në një njoftim të mëtejshëm, ndërsa vijojnë kontrollet nga autoritetet përkatëse.
Deri më tani, nuk janë bërë publike hollësi të tjera mbi burimin e kërcënimit apo rezultatet e kontrollit të avionit.
