Studentët e Mjekësisë kanë nisur grumbullimin edhe këtë të martë, duke vijuar marshimin drejt Ministrisë së Arsimit në Tiranë.
Protesta e sotme vjen pas njoftimit të bërë një ditë më parë nga të rinjtë, të cilët kanë paralajmëruar se do të mblidhen para ministrisë për të përsëritur kërkesat e tyre. Një nga kërkesat kryesore të protestuesve mbetet dorëheqja e kryeministrit Edi Rama.
Mëngjesin e sotëm, kryeministri Edi Rama ka përsëritur ftesën e tij për dialog me studentët. Megjithatë, deri më tani, kjo ftesë është refuzuar nga protestuesit.
Protesta ka hyrë në ditën e saj të 15-të, ndërsa gjatë ditëve të fundit janë regjistruar tensione, përplasje mes protestuesve dhe policisë, si dhe shoqërime të personave në komisariat.
